Суратдаги Ҳақиқат | Расмий канал

  Янги Қонун лойиҳаси билан Маъмурий жавобгарлик тўғрисидаги кодексида автоматлаштирилган фото- ва видео воситалари ёрдамида қайд этиладиган ҳуқуқбузарликлар аниқ санаб ўтилмоқда. Хусусан, улар Маъмурий жавобгарлик тўғрисидаги кодекснинг 13 та моддаси:
 
1) 125-модданинг 1, 5 ва 6-қисмлари (яъни, хавфсизлик камарини тақмаслик, давлат рақамини ечиб олиб бошқариш ҳамда тегишли бўлмаган рақамни тақиб олиш);
  2) 128-модда (яъни, транспорт воситаларини тротуарлардан, велосипед йўлкаларидан, яшил майдонлардан юргизиш, йўл белгилари талабларига риоя этмаслик);
  3) 128/1-модда (яъни, бошқариш вақтида телефондан фойдаланиш);
  4) 128/3-модда (яъни, тезликни ошириш);
  5) 128/4-модда (яъни, светофорнинг тақиқловчи сигналига риоя қилмаслик, тўхташ чизиғини босиб кириш);
  6) 128/5-модда (яъни, махсус транспорт воситаларига халақит бериш, авария ҳолатини юзага келтириш, йўлнинг қарама-қарши йўналишига чиқиш);
  7) 128/6-модда (яъни, тўхташ ёки тўхтаб туриш қоидаларини бузиш);
  8) 128/7-модда (яъни, автобуслар учун ажаратилган тасмада ҳаракатланиш);
  9) 128/9-модда (яъни, қувиб ўтиш қоидаларини бузиш);
  10) 128/10-модда (йўл безорилиги);
  11) 129-модда (гуруҳ бўлиб ҳаракат қилишда қатнашиш);
  12) 130-модда (яъни, темир йўлдан ўтиш қоидаларини бузиш);
  13) 135-модданинг 2-қисми (яъни, транспорт воситаларини бошқариш ҳуқуқи бўлмаган шахсларнинг бошқариши).
  Демак, эндиликда халқ тилида айтганда “полосани босганлик” ҳолати камера орқали қайд этилмайди.
    Қонун лойиҳаси билан Маъмурий жавобгарлик тўғрисидаги кодекснинг 36-моддаси учинчи қисм билан тўлдирилиб, унга мувофиқ - йўл ҳаракати қоидалари бузилганлиги фото ва видео воситалари орқали қайд этилган ҳолларда маъмурий жазо ҳуқуқбузарлик содир этилган кундан бошлаб бир ойдан кечиктирмай, қарор устидан шикоят қилинганда эса бир йилдан кечиктирмай қўлланилиши мумкин.
   Яъни, эндиликда камера ва радар орқали аниқланган ҳуқуқбузарлик учун қарор бир ойдан кечиктириб чиқарилган бўлса жазо қўлланилмайди (иш тугатилади).
   Қонун лойиҳаси билан таклиф этилаётган энг муҳим янгиликлардан бири – бу Маъмурий жавобгарлик тўғрисидаги кодексига “Маъмурий огоҳлантириш” институтининг киритилишидир. Хусусан, кодекс янги 282-модда билан тўлдирилиб, бунда маъмурий жазолар тизимига янги “маъмурий огоҳлантириш” жазо чораси киритилмоқда.
   Ушбу чора, қуйидаги 6 та ҳуқуқбузарликларни биринчи марта содир этган шахсларга қўлланилиши белгиланмоқда:
   1) 125-модда (яъни транспорт воситаларидан фойдаланиш қоидаларини бузганлик, ш.ж. камар тақмаслик, техник кўрикдан ўтказмаганлик, тегишли жиҳозлар билан жиҳозланмаганлик);
   2) 128/1-модда, (яъни, бошқариш вақтида телефондан фойдаланганлик);
   3) 128/2-модда (яъни, бошқариш вақтида монитордан фойдаланганлик);
   4) 128/6-модда (яъни, тўхташ ёки тўхтаб туриш қоидаларини бузганлик);
   5) 135/1-модда (яъни, мажбурий суғурта қилиш талабларини бузганлик);
   6) 138-модда (пиёдалар ва йўл ҳаракати бошқа иштирокчиларининг йўл ҳаракати қоидаларини бузганлик).
   Албатта, огоҳлантириш биринчи марта содир этган шахсларга нисбатан бир йилда бир маротаба қўлланиши мумкинлиги белгиланмоқда.